:o[align=center]
الأفكار تتقادح فيشعل بعضها بعضا وهذا ما حصل لي ...فأنا أكتب الآن أفكار متداخلة طازه (على لهجة أهل بنده ).
كنت نايم البارح من الطفش ويمكن لأني متعشي فول والفول بطبعه ثقيل ...ما الغريب إلا اللي ياكل فول في بريطانيا...مزاجه رايق ...
تحلمت إني جالس مع أمي .....وأختي عطتني سنكرس (بالتحديد موب تويكس )وقالت أقرأ تاريخ الصلاحية فتحته...
باكله (قالت ترى فيه كحول >>>يعني شكلنا كنا في بريطانيا مو في السعودية ....مو هنا الغريب في الحلم ..الغريب:
كانت عضوة في في المنتدى من جالسة معانا ....أموت وأعرف مين عازمها وليش جالسة ...وش دخلها بالحلم ...والله ماني عارف
شكلها أضغاث أحلام...
نمت مرة ثانية لأني بطبع لما يضيق صدري ...أخربها نوم وما أدري أنا صحيت أو ما صحيت فكان ما أود قوله الآن هو حلم أو هو (daydream) ما لقيت لها معنى في العربي حطيتها أنجليزي : أو شكلها بالأصح (أحلام يقظة ).مالنا دخل...
عدت إلى الوراء سنوات فتذكرت الزواج وما فيه من أفكار وطموحات ...وعلمت أن الزواج فعلا قسمة ونصيب ..
فغالبا عندما نكون في سن المراهقة المزمنة من بعد 18 حتى 24 نتمنى ملكة جمال زي زينب العسكري أول ماطلعت(داخله مزاجه )..أو زي (دينا عبدالله )>>>كان يموت فيها عليه ذوق..
ولاتهون ريما الشامخ (الله يشفيها إذا هي مريضة )>>>كان يقهر أهله إذا جت يجلس يطالع لين تروح ..
وكان الشخص مغرور وأنا عندما أتكلم أتكلم عن غرور الشاب وليست الفتاة فما أستطيع أن أتكلم عن مشاعر فتاة لأني (ماعمري بيوم من الأيام صرت فتاة عشان أعرف كيف يفكرون ).وإن كان تفكيرهم طلب من المطعم وماركات ..********ما يحسد البنات إلا على اهتمامهم بالدراسة وسرعة تعلمهم للغة.
أعود فأقول الشاب عندما يفكر بالزواج يتمنى ملكة جمال...ومتعلمة جدا ....وشعرها طويل ...ومطوعة وإن كان هو أصيع واحد بالحارة ...وأشين واحد بالحارة وأفشل واحد دراسيا ...هذا دليل واضح على عدم إتزان المشاعر في المراهق...هذا أخوي الصغير أبغاه يتزوج وكل يوم اقترح عليه وحدة يقول لا (أبغى مدرسة )..أخوي هذا صار له ست أو سبع سنوات في الجامعة ...ولسه بالسنة الثانية من الجامعة...يعني فاشل لأبعد الحدود دراسيا ...أموت وأعرف كيف يفكر أخوي هذا ...هو دمه خفيف وثقته بنفسه عاليه ...بس يقهرني لما يتشرط شروط مستحيل بنت بهالمواصفات اللي يبغاها توافق عليه ...
عدت للورى زمنا بعيدا ...: فتذكرت أيامي أثناء هذا السن >>مثل اللي يقول كبرت وعقلت..
فكنت أبي بنت مافيه زيها ....أموت وأعرف أيش كان فيني حلو ...الحمد لله على كل شيء ...ما أعتقد فيني شيء تتمناه كل بنت إلا إني أعرف أطبخ زين وأغسل المواعين وإن كنت كاره ....وهذا ما جعل زميلي ابن عايد يقول أنصحك تحول تخصصك طبخ ..من زين وجهك رايح للمحلقية كاتب تغيير تخصص إلى طبخ عربي...قلت لا من زين وجهي راجع للسعودية أبشر أهلي صرت شيف هههههههههههه.قال ياخي أنا ما أمزح أنت فعلا موهوب أجل
أحد لما خلص الهيل : حط زنجيل مع فلفل أسود مع القهوة وخلاه زي طعم الهيل ولا أحد من أخوياه درى ؟وطلع من موقف محرج!!
أحد يسوي بيض مقلي بالمكرويف ..والله عندك مواهب ...قلت أقول هنااك بس قبل أصدق...يلعب علينا وش قال قال موهوب .
كان فيه صديقة لامي عندها بنت: كل أبن أنثى يتمنى أن تكون هذه زوجة له وأم لأطفال ...وكانت أمي على مرور السنين تطلبني وتحب راسي آخذها وكانت كأنها مضمونة ...ما أبغى أقول أسباب الضمان...
وآخر مرة كانت فرصتي فيها في لحظاتها الآخيرة : جتني أمي وأنا جالس على الكمبيوتر في السنة الرابعة من الجامعة ..في الأختبارات النهاية .......:قالت عادل ولدي : البنت خطبها واحد العصر ...وواحد المغرب ....والبنت بالعربي تبغاك ..يعني إشارة منك تكون من نصيبك ....قلت يمه أنا ما أفكر فيها ماتصلح لي ولا لتفكيري ....تدرون يا ناس ليش ما كنت أبغاها ....؟
بقول لكم إني مريت بمراحل تفكير ما مر أحد فيها أنا ما أدري هل تلكم الفترة كانت كثرة القراءة أثرت فيني ..أو المراهقة ..أخذت نصيبها مني ......وإن المراهق له تفكير يمكن يكون غبي...
كنت ما أبغى هالبنت لأنها ملكة جمال ...وما فيه أحد بالدنيا ما يتمناها .....ملكة جمال ...فنانة تشكيلية ....شاعرة شعر فصحى وعامي....كاتبة روائية ....في أشهر الجرائد السعودية ......
تدرون ليش ما كنت أبغاها ..: لأن كل شخص يتمناها ...ما أبغى آخذها ...وأحد نفسه فيها ...أو : يقولون عادل آخذ عهود بنت فلان .. فتكون زوجتي على لسان اللي (يسوى واللي ما يسوى ).
وبما إني كنت في قرية صغيرة من قرى القصيم ..: كنت أحلم أتزوج وحدة من مدينة عشان ترفعني شوي تخليني آكل بملعقة وشوكة ....
كنت أتمنى أتزوج من خارج حدود المنطقة الوسطى لاختلاف الثقافة :
ودي أتزوج وحدة فيها طبع الشاميات : البيت مليان طيور وحمام وقطاوة********يبغى بيته حديقة حيوان..
وأبغى البيت مليان تحف ومزهريات....مو زي بيوتنا ما فيها إلا دلال وفناجيل ...مسووين فيها حاتم الطائي ...
وإلا كنت أبي أتزوج وحدة من جدة تعرف بالماركات عشان أصير أتكلم بالماركات ما ينلعب علي :
كان فيه هندي يشتغل بالقصيم بمحلات شطن نسائية وعايش أحسن عيشة ....
بعدين انتقل للرياض بعد ما كثرت فلوسه يبغى يكبر بالتجارة ...وقابلته بعد فترة طويلة :..قلت هاه أحسن القصيم أو الرياض ...قال يا زين القصيم وحريم القصيم :
قلت ليش ؟
قال ياخي نلعب عليهم...نجيب شنط من الصين على ريالين ..ونقول لهم هذه ماركة عالمية ..ويصدقون ويشترونها ...
ما يدرون إن الماركات ما تباع إلا بمحلات خاصة.!!
رحت قلت لأمي صحيح المحلات يلعبون عليكم ...
قالت والله إننا يالقصمان حنا أهل الماركات العالمية بس الناس ماتدري عن شيء ...أصلا الماركات مابدت إلا بالقصيم ..هههههههه فديتها .
وين وصلنا ؟
أيه :البنت اللي كل واحد يتمناها ...
بعد ما كبرت وعقلت (قلت هذه من الأشياء التي لو أستقبلت من حياتي ما أستدبرت ما تزوجت غيرها )ومن الأشياء التي لو استقبلت من حياتي ما استدبرت (ما دخلت نت ....ولا تخصصت لغة عربية في الجامعة ).
كنت أتكلم كثير في هذه الأفكار ففعلا : وجدت المراهق في زواجه والمراهقة عندما يكبرنا يكون في بالهم عكس ما كانا يريدون :
تجد الدكتورة رفضت ناس بالماجستير كثير كثير ...وتحدها الدنيا فتأخذ شخص معاه (سادس ابتدائي ).
وأعرف كثير كذلك ....
وقد حصلت لي إنسانة تحضر الدكتوراه وصغيرة بالسن ورفضتها...وندمت عليها بعدما علمت أنها فعلا كانت مميزة.
لذلك من أشرف على الزواج لا يتشدد كثير ولا يتنازل كثير (إذا كان أمنية حياته : ملكة جمال ..لا يأخذ واحد شينة جدا ...يعني ياخذ عادية أو حلوة ...وتأكدوا ترى الجمال عندنا بالخليج ....بنسبة عشرين بالمئة .يعني ما عندنا جمال بالكلام اللي نسمع فيه ......تدرون ليش ....
لأنكم يالشباب ما يحق لكم تتشرطون لأننا شينين حنا بعد وحنا من بعض الشين ما يخرج إلا شين ...****************عشان البنات ما يزعلون سبيت الشباب عشانكم ..
لكن بتلاقون ملكات جمال ...وإن كان ملكات الجمال ياخذونها الصقور قبل تكبر ....لكن والله عندنا بالخليج ...دين وحسب ونسب وشهامة وكرم في النساء قد لايوجد في نساء العالمين ...
وأذكر أبوي يقول ورى ما تتزوج ..: قلت أبي ملكة جمال : قال والله ترى السعودية ما فيها الزين اللي تبي .
تبي الزين روح لـ ...........!
لكن السعودية بتلاقي الكرم والشهامة والدين ....وبتلاقي من تحفظك في سر وعلنك وتحفظ عيالك بعد موتك ...
ولا يهونون بنات المسلمين أجمعين : وما دامت الديانة إسلام : فثق تماما أن العفة والطهارة في كل نساء المسلمين ...أجمعين ...مهما تغيرت الدولة والمكان ومسميات الجنسيات ...فالله واحد.
وأنت اختار يهمك الجمال أوالدين و الأخلاق .....
من ضمن خطوباتي ********خطب تسعين مرة ما أحد وافق عليه >>>دليل على إن مافيه شيء زين.
مرة من المرات تزوجوا كل أخوياي قلت وأنا وش ناقصني :
يلله يا أهلي دورا لي أي وحدة ؟
وهذا أكثر زواج الشباب عندنا كذا ..يلف يلف ويرجع يقول لأهله نجزونا أي واحد تمشي الحال ترى الحياة عشرين سنة وحنا ميتين مالها داعي نسوي زحمة.ما عاشوا حب أبائنا وأجدادنا نجي حنا بنعيش قصص ماجدولين...
فلانة ؟ لا
فلانة لا
فلانة أيه تمشي الحال ...>>>شوفوا المراهقة .
أخذوا أهلي موعد من عائلة البنت وكلموهم تليفون : قالوا تعالوا ...حياكم ....
ودريت إن البنت فضيحة وافقت على أطول ....أختي الصغيرة وظيفتها بالبيت تعليق تقول والله من زين الزوجة ماصدقت بخبر >>أختي هذه عبيطة دائما تهطسني بخفة دم ، وما أقدر أسكتها لأنها تجي على الجرح ...
جاء يوم الموعد : كلمت زملاي مع السلامة ...بودعكم يالعزاب ...مالت عليكم : (واثق إنهم بيوافقون ).
كانت أمي تقول ترى يمكن مايوافقون ؟
قلت وش ناقصني إلا بيوافون ونصف ...لهم الشرف آخذ بنتهم ..والله غرور تجيكم السالفة ....!
رحنا أنا وأبوي وأخواني ....
دخلت البيت كان رخام .....: نزلت جزماتي برى ...أبوي وهو شايب دخل بنعاله ...وأنا نزلتهم برى يوم جلست لقيت كل الموجودين لابسين نعالهم إلا أنا بشرابات ....يافضحي ...المهم :أنا أصغر الموجودين في المجلس ..فكنت بطبعي أصب القهوة إلا هالمرة مستحي مسوي نفسي عريس ..صار أخوي يصب القهوة وكنا فترة الصيف فكان فيه سكري القصيم : توه نازل ؟
فقلت على بالي بسولف بسوي مو مستحي هذا من نخلكم ؟ وإلا من الحوش ؟
قال إيه نخلنا ترى بالحوش ما شفته وأنت داخل ********طاح وجهي ....
المهم ما أكلت إلا نصف تمرة من الحياء وصب لي أخوي قهوة ماشربتها .
فكانوا حاطين أنواع الحلويات وكان فيه باتشي بحياتي ما أكلته ولا حصلت لي فرصة فيه إلا ذاك اليوم وراحت علي..ما ذقته :
لي أخ صغير مهستر جاء بعد ما جينا وأخ رجل كبير مهستر : هالأثنين أصدقاء لدرجة أربع وعشرين ساعة مع بعض أموت وأعرف وش هالسر الفرق بينهم خمس طعش سنة :
المهم شافوا الحلويات : وحطوا أيدهم هسترة علي وتعليق ويأكلون. أبو البنت مدري وين راح:
ما انتبهوا أخواني إلا يوم خلصت الحلويات قال الكبير : ثامر فضحتنا يقولون وش هالمشافيح ماعمرهم شافوا حلويات؟
بالله عليك شيل القراطيس وأرميها بالزبالة ؟
قال الصغير لا يمكن يقولون وش هالمشافيح أكلوا الحلويات بقراطيسيها ! ههههههههههههههههه
قال لا لا لا !
تكفى أجل خليهم مكانهم ....هههههههههه
...وطلب أبوي : ...البنت من أبوها : قال والله البنت بنتك : بس البنت تبي تكمل دراستها ...>> هذا أسلوب رفض مؤدب أفهموه يالشباب إذا صرت بنفس الموقف لاتقول عادي أخليها تكمل دراستها ....يعني بالعربي رافضين ...
أنا وقتها طار الحياء مني ....وقربت الدلة والتمر وجلست آكل ....قفلت معاي ....
بعد ما طلعت كان أغلى شيء عندي ساعة مشتريها بـ 250 تقريبا ...
ذيك الفترة قبل سنوات : أعتبرها غالية جدا جدا ..
بس لما رحت بريطانيا وسكنت في الرياض : دريت إني مضحك جدا ....
طلعتها ولبستها أخوي الصغير مسوي نفسي : أمير يهدي شخص أعجبه ...لأني تهورت في خطوبتي وتنازلت عن أشياء وطموحات كثيرة ...بتوفيق الله لم تكن لي...
وهذه من ضمن خطوباتي :
وعشان كذا أختي الصغيرة مسجلة جوالي عندها باسم : المعيوف هههههههههه.

وهذه مقتطفات :
ذكرتها : في قصتي (حنان الدبة والمبتعث الملقوف )عندما التقيا أول مرة في قهوة في أدجوال رود.
عندما كان المبتعث الملقوف في المطعم فسمع صوت الخليجيات فيبغى يتعرف : الغبي مفكر أي مبتعثات يبغون يتعرفون ..فالمبتعث الملقوف ما عمره كلم بنت بحياته وجاهم بأسلوب قبل خمسين سنة أيام بشير الأحسائي وعيسى حمد شنان...>>عكس الأسمين.
قال أنتم مبتعثات ؟ قالوا أيوه ...ليش؟ لايكون تبي نترجم لكم بس..تطلب أكل..مافيه خنزير..
قال لا بس أشوفكم متحجبات وحاطين مكياج >>>يدق على البنات..
انحرجوا البنات وسكتوا ....!
قالت حنان الدبة :أنت مبتعث جديد ؟ !
قال لا أنا لي ثلاث سنوات !
قالت : والله مو باين لو أبحلف مالك ثلاث أيام ..........!
ضحك هو مووووت قال وربي صدق ؟ وشلون عرفتي؟
يحسبها شبكت معاه الخبل !
وهي مرفوع ضغطها منه!من كلامه ..
قالت يعني لك ثلاث أيام ؟ قال أيوه بس وشلون عرفتي؟
قالت أشوفك ساحب الجنز لين (تسبدك ) ههههههههههههههههههه باين يا بنات أول مرة يلبس جنز بحياته ...
والبنات يطيحون ضحك ..هههههههههههه..قسم بالله إنك مطرطعة ياحنان ....!
قال هو بالله تعالي دغدغيني خليني أضحك معاكم ...
إلا بسألكم بنات كلكم مثل هذه لكم كم سنة ؟!
قالوا أيه حنا قروب جايين مع بعض ؟!
قال والله مو باين وأنتم لابسين نظارات شمسية بالليل على بالكم كاشخين ههههههههههههههههههههههههههههههه.وما سمع إلا بنات بجلسة وراهم خليجات تقل أوربيات يتنافضون من الضحك ....وإلا والمطعم كله يتنافض ضحك ...صار المطعم كله عرب.تقل خواجات .....وأنا بالزاوية كنت جالس وطحت على الأرض من الضحك ....فسجلت هالقصة بوقتها ..

الأحد : 5/4/2009.

[/align]

مدرس عربي
شكر على الطرح
الاكثر من رائع
ههههههههههههههههههههههههههههههههههههه
بس سواليف حلوه ليتك اختر القسم المناسب كوكتيل
اجل لا صرت تبي تعرس وقالولك تبي تكمل تعليم اجل مافيه امل
ولا الداشر اللي في الحاريه لما يبي يعرس يبله وحده مطوعه ههههههه
ولا المبتعث هههههههههههههههههههههههههههه
يعطيك العافيه
تقبل
\
/
\
تحياتي

بصراحه ... اطرروحه اكثر من رائعه ..حتى الاسلوب مشوووق جداا ان الواحد يقرا ويكمل ... انا المفروض اطلع اساسا بهالوقت بس بصراحه جذبني الاسلوب اني اقرا واتابع ...حى الكلام من صميم الواقع ... اطروحه رائعه جدا جدا جدا ... يعطيك العافيه ...تحياتي,,,,

صدقاً ..

ممتع وجميل ما قرأت ..

ورائع .. مابين السطور ..

شكرا لك ..


اختكــــــــــم .

والله سوالفك عجبتني مره جدا رائعة وطريفه جدا

يعطيك العافيه وبانتظار باقي السوالف