السلام عليكم ورحمة الله وبركاته
عندي سؤال لو تكرمتوا اللي يعرف او الاخ محمد ياليت يجاوبني وجزاكم الله خير ..
في قروب ع الواتس جاني فاتح على اساس انو لمديرة مكتب الضمان عندنا والموظفات الظاهر اللي معها ودخّلوا ناس كثير فالقروب من المستفيدين من خلال الارقام اللي فصفحة كل مستفيد ..
وينزلون دورات وروابط ومدري شنو ويحثونا نسجل فيها ونرسل بياناتنا عاد انا خفت صراحه وما سويت شي من اللي قالوه هل لازم اسجل فالدورات اللي منزلينها ولا انتظر لحين صدور شي رسمي افيدوني جزاكم الله خير واعتذر ع الاطاله .

وعليكم السلام
اول شئ ممكن تتأكدي ان القروب هو من اسسه مديرة الضمان وذلك بتطبيق اسم المديرة بالبحث بقوقل عن اسم مديرة الضمان (هل الاسم متطابق)
البحث عن رقم هاتف الضمان النسوي بمنطقتكم وسؤالهم عن القروب هل هو صحيح من عدمه
وانتي جالسه وبالتلفون يتضح كل شئ
هذا بصفه مبدئيه وحتى يرتاح قلبك
اذا كان هذا الموقع يطلب صوره هويه فلاتتجاوبي معهم ابدا ولاترسلي اوراقك الشخصيه لهم ابدا
مثلا نزلوا دوره بجهه فلانيه في اي قطاع فأولا اتصلي على الجهه تلك وسؤالهم هل هذه الدوره ستعقد لديكم ام لا
اذا فعلا انها ستعقد فسجلي فيها لكن بدون بعث اي مستندات خاصه بك
بالنسبة للتوظيف .فيه بالضمان قسم للتمكين ويمكن التعامل معهم وتزويدهم بالهويه وحتى لديهم نشره بالدورات والجهات المتعاونه معهم
للاطلاع على هذا الموضوع بس للاحاطه اذا احتجتي لمعلومات عنه https://www.btalah.com/t753534.html
بصراحه بوقتنا الحالي لاأحد يثق بأي موقع هناك اناس تم النصب عليهم ومن حق المستفيد ان يحتاط لكل شئ
النظام الجديد حتى الأن لم يطبق
هناك ادارة للضمان وأقسام مسئوله عن الدورات والتوظيف وهناك منصات خاصة بها

__________________
لااله الا انت سبحانك اني كنت من الظالمين .. استغفر الله العظيم
اللهم احفظ بلادنا وولاة امرنا وأمدهم بالصحه والعافيه
ان غبت يوما فتذكروني بدعوة صادقه وان اسأت او اخطأت بحقكم فكونوا كرماء
دخول للمنتدى قليل والمعذره

قروب باسم مديرة الضمان شي غريب الا كانك متاكده
وتعرفين اسمها بالكامل ومن اي مكتب او منطقه
واذا حاطه اسم قروبها اي كلام فاحذري
ونا اختك لازم تنتبهين هالايام يكثرون الاستغلاللين
حتى من برى المملكة ويمشون معكم
حتى توصل لرقم حساباتكم البنكية فانتبهوا الكلام للجميع ربي يحفظكم .

الله يجزاكم خير على الرد ويعطيكم الصحه والعافيه ويبارك لكم يارب اي والله انا من شفت الاغلب غادروا القروب خفت وسحبت عليهم قلت اذا فيه شي رسمي بيجي من مصادر موثوقه مثل هالمنتدى والاخ محمد وكل الاعضاء مايقصرون دايم يوافونا بالجديد اسأل الله ان يوسع ارزاق الجميع ولا يجعل لنا حاجه عند احد من خلقه الله يسامح اللي يحط هالشروط التعجيزيه علشان يطفشون الناس من الضمان اللي هو مصدر رزقنا الوحيد ومايدرون كيف ممشين حياتنا بهالظروف الصعبه ولّا واحده مثلي على مشارف الاربعين لاشهاده عاليه وساكنه بقريه مافيها اي مكان ممكن اتوظف فيه ولا عندي لاحفي ولا لفي الا وجه الله سبحانه وابوي شايب كبير بالسن اقسم بالله حتى عُمره امنية حياتي اروح اسويها اذا شفت الحرم بالتلفزيون عيوني تمتلي دموع وادعي ربي يحقق لي هالمستحيل لو اخر يوم بعمري الحمدلله على كل شي وكل حال وكل ماكتب لنا الله من اقدار وارزاق الحمدلله الله يرزقنا رضاه والجنه ويصلح حالنا جميع معليش لو خرجت عن نص السؤال لكن فاض بي جزاكم الله خير.

كل شئ تغير بالدنيا نصب واحتيال ولاعاد الواحد يصدق ومن كثر مانقرأ للمأسي اصبحنا نخاف من اي شئ
واحد باكستاني اتصل بي الصباح وقبل طلوع الشمس وبلهجته انت لازم يجدد بطاقه صراف بطاقتك انتهت ويبي رقم الهويه ورقم بطاقة الصراف وارسلت رقمه على 330330
المهم اننا لسنا اغبياء حتى يتم الضحك علينا من حشره حقير
ربي يوفقك يابنتي وبالنسبة للعمره اللي نفسك تعمليها انا متكفل بمصاريفها واعتقد الأن انها موقوفه بسبب الحج ومتى ماصارت النيه لديك راسليني وابشري بالسعد

اسأل الله الكريم ان يرزقك ويسعدك يابنتي وكل من قرأ
شكرا لمن شارك
يغلق